好L滾動之溫哥華唯一間正宗澳門菜 ＠ 澳門茶餐廳！！

首先好老土地都要同大家講句二零一柒新年快樂呀！！


其實我呢邊而家已經差唔多半夜兩點，
但係我點都一定要打埋呢篇blog先，
因為我真係好L滾動，
溫哥華....竟然有正宗澳門葡國菜嘅茶餐廳！！
溫哥華識到既澳門人，真係激少，
好似我地呢啲毒在異鄉為異客又為數極少嘅澳門人，
可以喺加拿大食到澳門嘢，係幾撚hi心既事！！！
所以今日一食完就打算今晚一定要喳喳林寫咗佢，
等大家可以感受到我嘅興奮同激動！


呢間「澳門茶餐廳 Kam's Restaurant」，因為佢地啱啱開始試業，未正式開張，
所以你地暫時都未可以喺google搵到佢，
但佢大概位置係 2415 Main St, Vancouver (Main St & Broadway附近）


我地今日有7-8條友去食，
全部都係喺溫哥華認識到嘅澳門人！
考慮緊好唔好開番個溫哥華澳門同鄉會。



好啦廢話唔好咁多了！
嚟到緊係點都要試個馬介休球啦！！

哇diu真係好L好食！！
呢味道....這口感....!好掛住，好懷念呀！！！
好啦循例都要解釋下咩係馬介休，
馬介休（來自葡語：Bacalhau），是鱈魚經鹽醃製而成，是不少葡萄牙菜與澳門葡式美食的主要材料
（其實呢個係維基搵番嚟，你唔係又expect我慢慢同你解釋呀化...!lol）

馬介休球就係將蒸熟左嘅馬介休同薯仔，攪爛佢再加其他配料同調味然後炸，
外微脆內軟，好香而且味道剛剛好！重點係老細唔菇寒，
廚師又細心，入面啲馬介休，根根分別，好明顯真係落足心機撕碎佢！

一定要趁熱食呀！
必點，強烈推薦！
如果你去食唔叫馬介休球你唔好同我講你食左澳門菜呀！







再嚟非洲雞（半隻雞）
非洲雞其實我真係第一次食，
呢道咁特色既澳門葡國菜我竟然咁多年黎都冇食過！

必點，必點，必點！！！！！
好重要所以要講三次！！！！！
佢個非洲醬，真係超L正！
呢個非洲雞是辣的，但因為我胃唔好要戒辣，所以佢地好好只係整咗小辣，
個程度我可以接受！
啲雞整得啱啱好，肉又多，點住啲非洲醬食，
真係正到冇朋友，
我都未講佢啲薯仔，
外脆內軟又唔怕好乾，應該係炸過嚟，
但又同美式早餐哥啲薯仔完全唔同口感同味道，
我都唔識點形容，未食過咁樣嘅薯仔，好好好好好食呀！！






話明食葡國菜，點可以唔點焗葡國雞飯呀！！
一定要點嚟試下啦！！

好食！！
啲雞很嫩！！個汁好香椰子味～～好正，用嚟撈飯食一流！
份量都好大！
佢仲比咗豬仔包我地嚟點汁食！！
豬仔包....呢個名我有多9無聽過了 ....!!!

繼續澳門菜特色之一，馬介休雞粒炒飯！
非常之好食！又夠鑊氣！好香嘅馬介休味！
我平時好憎食檻欖，但今日我接受左佢嘅愛，
一定係因為馬介休呢位媒人既功勞。
其實馬介休，就好似係葡式鹹魚咁，
換言之，呢個就有如鹹魚雞粒炒飯，
但係！
今日我地當中其中有人，係唔食鹹魚的！
但佢都覺得呢個炒飯唔錯！
所以值得一試！！

葡式沙甸魚
呢樣係佢地小食嘅其中一樣，
同樣推薦，
好懷念沙甸魚嘅味道！ 
唔知佢係煎定燒，sor9ry我呢啲外行人最後都係判斷不了!
外表有點脆脆的，
入面啲魚肉唔怕乾！保持到佢嘅鮮嫩，
個味調得好特別，好開胃，用嚟送飯真係一流！
（是否我心理作用...為何我連佢隻碟都覺得好有澳門feel...)

不過老老竇竇，如果你係啲好懶好憎有魚骨嘅人士，
就不太建議你點呢個！因為沙甸魚是多骨的，
可以改試佢地嘅葡式多春魚！








太多肉喇！點都要點啲蔬菜食下，
唔係陣間便秘仲點食好西呀！
葡汁焗四蔬 - 西蘭花，西芹，椰菜，紅蘿蔔
個汁同葡國雞汁差唔多，都係有椰香味，
但係因為係素菜類，所以佢冇葡國雞汁咁濃，
但都好好食！素食者可以考慮考慮！

炸雞軟骨！
個味道唔錯的！入面都juicy嘅，可惜我覺得佢地外面層炸皮厚咗少少，
如果薄啲會好啲！

嘢飲熱杏仁露，西洋菜蜜同紅豆冰

又係總結嘅時候，
呢間餐廳個Chef係澳門人嚟㗎!
食物質素高不在話下，性價比高！
雖然佢價錢係略偏高，但佢每一道菜個份量都好大，
我地一共6個大人2個細路（當佢地一個人）
計埋稅同tips應該大約每人＄15－20 CAD，
都食到好L飽，最後仲要食唔完要打包！
同埋佢係溫哥華唯一一間正宗澳門菜嘅餐廳，
誠心推薦大家去試下！
（唔好問我列治文某food court 某間山寨版，
哥間嘢嘅豬扒包完全唔合格，仲用我地澳門豬扒包個名！我都仲未嬲完咋！）




食完呢餐嘢，
搞到我又homesick了，好掛住澳門呀！
雖然我人在外國，但我心與你同在...!!!!!




Kam's Restaurant 澳門茶餐廳
地址：2415 Main St, Vancouver
(Main街 ＆ broadway附近）
https://www.facebook.com/Kamsrestaurant